अर्थमन्त्री डा. प्रकाशशरण महतले नेपालमा छिट्टै लगानी शिखर सम्मेलन गर्ने घोषणा गरेका छन् । शुक्रबार सिंहदरवारमा आयोजित लगानी बोर्डको १२औँ वार्षिकोत्सवको अवसरमा उनले विश्व बजारमा सूचना प्रविधिको क्षेत्रमा स्थापित कर्पोरेट कम्पनीको लगानीसमेत नेपालमा भित्र्याउने गरी सो शिखर सम्मेलन आयोजना गर्ने लागिएको बताएका हुन् ।

अर्थमन्त्री महतले नेपालमा आर्थिक वृद्धि बढाउने राम्रा संकेतहरू देखिएको उल्लेख गर्दै त्यसले मुलुकको आर्थिक गतिविधिले बढावा पाउने विश्वास व्यक्त गरे ।

‘हाम्रो विदेशी मुद्राको सञ्चिती राम्रो छ । पर्यटक आगमन वृद्धि भइराखेको छ । त्यसले पनि आर्थिक गतिविधि बढाउँछ । हाइड्रोपावरमा एउटा प्रगति लय पक्रिराखेको छ । र, इन्डियासँग जुन सम्झौता भएको छ १० हजार मेघावाटसम्म विद्युत खरिद गर्ने दश वर्षमा,’ अर्थमन्त्री महतले भने, ‘त्यसले लगानीकर्तालाई एउटा सुनिश्चित मार्केट प्रदान गरेको छ । त्यस्तै खालको समझदारी हामी चीनसँग पनि आगामी दिनमा हुनेछ भन्ने हामीले विश्वास लिएका छौँ । त्यसले एउटा थप बजारको सम्भावना छ ।’  

नेपालमा पर्यटन, कृषि, जलविद्युत र सूचना प्रविधिको क्षेत्रमा लगानी बढ्ने र बजारको पनि राम्रो व्यवस्था भएकाले यस क्षेत्रमा बाह्य लगानी भित्रिने समेत अर्थमन्त्री महतले बताए ।

उनले भारतमा १० हजार मेघावाट विद्युत् १० वर्षमा खरिद गर्ने सम्झौता भएको र चीनमा पनि सरकारले सोही खालको सम्झौतालाई अब छिट्टै अघि बढाउने बताए । 

‘हामी पहिला पर्यटनको कुरा गर्दा पश्चिमी देशहरूको पर्यटकको कुरा मात्रै हाम्रो दिमागमा आउँथ्यो । अथवा जापानको हाम्रो दिमागमा आउँथ्यो । अहिले हाम्रो छिमेकी देशहरूमा आर्थिक उन्नती, प्रगति भइराखेको छ । त्यसले एउटा धेरै ठूलो सम्भावना टुरिजममा छ । तेस्रो सम्भावना हाम्रो यो एग्री सेक्टरमा पनि ठूलो सम्भावना छ । जुन हाम्रो टोपोग्राफी छ । भेराइट क्लाइमेट छ । त्यसले एउटा सहज वातावरण दिन्छ नेपालमा लगानी गर्ने र त्यसको बजार विदेशमा समेत प्राप्त गर्ने सम्भावना त्यसले दिएको छ,’ मन्त्री महतले भने, ‘अहिले आईटी सेक्टर यो वृहत् सम्भावनाको क्षेत्र छ । त्यसमा मेजर इन्भेष्टरहरूलाई विदेशमा जुन स्थापित आईटी सेक्टरका कम्पनीहरू छन् । तिनीहरूलाई हामीले ल्याउन सक्नुपर्दछ । र, हामी चाँडै अब एउटा लगानी समिट पनि नेपालमा गर्छौँ । त्यसको लागि तत्कालै हामी यथेष्ट गृहकार्य पनि सुरु गर्छौँ । बजेटमा पनि हामीले बोलेका छौँ ।’ 

उनले नेपालमा बाह्य लगानी भित्र्याउने काममा लगानी बोर्डले अझ प्रभावकारी ढंगले पहल गर्ने विश्वाससमेत व्यक्त गरे ।