राहतका शिक्षकहरूले सरकारसँग भएको सातबुँदे सहमतिमा असहमति जनाउँदै आन्दोलन जारी राखेका छन् ।
सरकार र नेपाल शिक्षक महासंघबीच शुक्रबार साँझ भएको सहमतिमा आफूहरूको माग सम्बोधन नगरेको भन्दै राहतका शिक्षकहरूले शनिबारमा काठमाडौंको माइतीघरमा आन्दोलन जारी राखेका हुन् ।
सहमतिमा ५० हजार राहतको शिक्षकको माग सम्बोधन नभएपछि आन्दोलन जारी राख्न बाध्य भएको नेपाल राहत शिक्षक केन्द्रीय समितिका अध्यक्ष खेमराज अधिकारीले बताए ।
उनले देशको सामुदायिक विद्यालय चलाउने असल शिक्षक बन्नका लागि राहत शिक्षक नै बन्नुपर्ने थियो । अरू विकल्प नभएको गुनासो गरे ।
‘देशको सामुदायिक विद्यालय चलाउने असल शिक्षक बन्छु भन्दा राहत शिक्षक नै बन्नुपर्ने थियो, अरू विकल्प थिएन । हामी रहरले राहत शिक्षक भएका हौँ ? गुणस्तरीय शिक्षक बन्छौँ र सामुदायिक विद्यालय सुधार्छौं भनेर लागेका हौँ,’ उनले भने, ‘स्थायी व्यवस्थापन गर्नुपर्दैन ? हिजो भएको सहमतिमा ५० हजार राहतको शिक्षकको असहमति छ ।’
उनले आफूहरुको माग सम्बोधन नभएसम्म घर नफर्कने भन्दै भने, ‘यो आन्दोलन भोलिदेखि झन् सशक्त बनाउने भनेर सबै जिल्लाका शिक्षक र आन्दोलन घटकका अध्यक्षहरू जुटेर राज्यलाई कसरी झुकाउने भन्ने रणनीति बनाएर मात्र घर फर्किनेछौँ, नत्र माइतीघरमै बस्नेछौँ ।’
बुधबारदेखि देशभरबाट सामुदायिक विद्यालयका शिक्षकहरू काठमाडौं केन्द्रित भएर आन्दोलन गरिरहेका थिए ।
शुक्रबार साँझ शिक्षकहरूसँग सरकारले वार्ता गरेपछि शिक्षकहरूको आन्दोलन स्थगित गरेको थियो । तर, सरकारसँग गरेको सातबुँदे सहमतिमा राहतको शिक्षकलाई नसमेटेको भन्दै उनीहरू आक्रोशित भएका हुन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।
0